கொரோனா தொற்று இன்றி உடல் தகனம் செய்யப்பட்ட பெண்ணின் குடும்பத்துக்கு நீதி வேண்டும்.

கொரோனா தொற்று காரணமாக உயிரிழந்ததாக தெரிவித்து கொழும்பு முகத்துவாரத்தை சேர்ந்த முஸ்லிம் பெண்ணின் உடல் எரிக்கப்பட்ட சம்பவத்துக்கு முன்னாள் பாராளுமன்ற உறுப்பினர் முஜிபுர் ரஹ்மான் கடும் கண்டனத்தை தெரிவித்துள்ளார். இந்த சம்பவம் நாட்டிலுள்ள அனைத்து முஸ்லிம்களையும் கவலையடையச் செய்வதாக அமைந்துள்ளது என்று அவர் கூறியுள்ளார். இந்த சம்பவம் குறித்து சரியான விசாரணை நடத்தி பாதிக்கப்பட்ட குடும்பத்துக்கு நீதி பெற்றுக் கொடுக்கப்பட வேண்டும் என்று முன்னாள் பாராளுமன்ற உறுப்பினர் முஜிபுர் ரஹ்மான் கூறியுள்ளார். இது தொடர்பில் அவர் வௌியிட்டுள்ள அறிக்கையில் மேலும் கூறப்பட்டிருப்பதாவது, இலங்கையில் 9ஆவது கொரோனா வைரஸ் இறப்பாக பதிவான கொழும்பு முகத்துவாரத்தை சேர்ந்த முஸ்லிம் பெண் உள்ளிட்டவரின் PCR அறிக்கை உள்ளிட்ட, கொரோனா வைரஸ் தொடர்பில் மேற்கொள்ளப்பட்ட பல பி.சி.ஆர் சோதனைகள் தவறானவை என, இலங்கை அரச மருத்துவ ஆய்வுகூட தொழில்நுட்பவியலாளர்கள் சங்கம் (The Sri Lanka Association of Government Medical Laboratory Technologists (SLAGMLT) தெரிவித்துள்ளது. இதன்மூலம் அந்தப் பெண்ணின் இறப்புக்கு கொரோனா தொற்று காரணமாக அமையவில்லை என்ற போதிலும், அந்தப் பெண்ணின் கணவனுக்கு கூட உடலை பார்க்க அனுமதி வழங்காமல் அந்தப் பெண்ணின் உடல் தகனம் செய்யப்பட்டுள்ளது. அத்துடன் அந்தப் பெண்ணுக்கு எவ்வாறு கொரோனா தொற்று ஏற்பட்டது என்பது தொடர்பில் இதுவரை கண்டறியப்படவில்லை என்று அந்தப் பெண் உயிரிழந்த மறுநாள் இராணுவத் தளபதி சவேந்திர சில்வா கூறியிருந்ததும் இங்கு சுட்டிக்காட்டப்பட வேண்டிய விடயமாகும். இதன்மூலம் இந்நாட்டு முஸ்லிம்களின் உணர்வுகளுக்கு சிறிதும் மதிப்பளிக்காமல் முஸ்லிம்களின் ஜனாசாக்கள் எரிக்கப்படுகின்ற நிலையில், தவறான பரிசோதனை அறிக்கைகள் மூலம் வேறு காரணங்களால் உயிரிழக்கும் முஸ்லிம்களின் ஜனாசாக்களையும் தகனம் செய்யும் நிலையே தற்போது உருவாகியுள்ளது. உயிரிழந்த நபரின் உடலை உரிய பாதுகாப்பு முறைகளுடன் அடக்கம் செய்ய முடியும் என்று உலக சுகாதார தாபனம் பரிந்துரை செய்துள்ளதுடன், ஐக்கிய நாடுகள் சபையின் மத விவகாரங்களுக்கான செயலாளரும் இலங்கை முஸ்லிம்களின் உணர்வுகளுக்கு இலங்கை அரசாங்கம் மதிப்பளிக்க வேண்டும் என்று கூறியிருக்கின்றது. அத்துடன் உலகத்தில் ஏனைய நாடுகள் கொரோனா தொற்று காரணமாக உயிரிழப்போரின் உடல்களை அடக்கம் செய்யும் நிலையில், இலங்கையில் மாத்திரமே முஸ்லிம்களின் ஜனாசாக்கள் எரிக்கப்படும் என்ற விடாப்பிடி கொள்கையில் அரசாங்கம் இருக்கின்றது. இந்நிலையில் சுகாதாரத் துறை அதிகாரிகளின் தவறு காரணமாக குறித்த பெண்ணின் உடல் தகனம் செய்யப்பட்ட விடயம் மிகவும் வருந்தத்தக்கது என்பதுடன், பாதிக்கப்பட்ட பெண்ணின் குடும்பத்தினருக்கு நீதியைப் பெற்றுக் கொடுக்க அரசாங்கம் நடவடிக்கை வேண்டும். அத்துடன் இனிமேல் இதுபோன்ற தவறுகள் இடம்பெறாது இருப்பதை உறுதி செய்வதற்கும் அரசாங்கம் நடவடிக்கை எடுக்க வேண்டும் என்பதுடன், முஸ்லிம்களின் உணர்வுகளுக்கு மதிப்பளித்து எதிர்கால செயற்பாடுகளை முன்னெடுக்க வேண்டும் என்று அரசாங்கத்தை கேட்டுக் கொள்வதாக முன்னாள் பாராளுமன்ற உறுப்பினர் முஜிபுர் ரஹ்மான் கூறியுள்ளார். KUMBUKKANDURA NEWS

முக்கிய குறிப்பு: KBKNEWS மீடியா இணையதளத்தில் செய்திகளுக்கும் கட்டுரைகளுக்கும் வாசகர்கள் பதிவு செய்யும் கருத்துக்கள் ஆசிரியர் குழுவால் தணிக்கை செய்யப்பட்டு பிரசுரமாகும் வகையில் மென்பொருள் வடிவமைக்கப்பட்டுள்ளது. வாசகர்களின் கருத்துக்களுக்கு KBKNEWS நிர்வாகமோ அல்லது அதன் ஆசிரியர் குழுவோ எந்தவிதத்திலும் பொறுப்பாக மாட்டார்கள். நாகரீகமற்ற மற்றும் பிறர் மனதை புண்படுத்தகூடிய கருத்துகளை / வார்த்தைகளைப் பயன்படுத்துவதை தவிர்க்கும்படி வாசகர்களை கேட்டுக்கொள்கிறோம். அத்துடன் உங்களது செய்திகளை Rinaz.kbknewsmedia@gmail.com என்ற ஈமைல் முகவரிக்கு அனுப்பி வையுங்கள்